Glasnik-SSNInformativno glasilo Samobora i Svete Nedelje

Veliki problemi našeg suradnika Romea Ibriševića s viškom pokretnina

Do Trebeža i natrag na autopilotu

Žena je rekla da je ormar star i da ga nek otpelam na reciklažu. Isti tren. Zmesta. Kaj sam drugo mogel nek sam mam posudil prikolicu i pravac rekciklažno dvorišče. Tam je djelatnica Dragica rekla da je ormar prevelki i nek ga pelam na Trebež. Ja sam im rekel da je ormar normalne veličine, samo kaj im je dvorišče premalo. Taman su se ljudi nafčili da otpad sortiraju, al ni dobro da se nerviraju.

Zapisali su kak se zovem i čiji sam i da sam došel iz Čudomerščaka i platil se kaj je Komunalac od mene štel, da tri kante raznih boja vlečem redovito na breg i sad po vručini i kad opadne sneg. Muka mi je kad se toga zmislim... Al čkomim, kaj drugo mogu.

Dok sam ja po navigaciji i sistemu "kartu čitaj seljaka pitaj" iskal kak da dojdem do Trebeža, taman je prešlo radno vreme. Dobro, priznam, navrnul sam se k Franceku u Hrastinu na bermet i za čas su prešle dve vure. Ak niste znali, tam delaju po letnoj šemi. Do dve vure. Inače, tam tak smrdi da ja nebi zdržal ni pol vure. Dobro kaj sam se dezinficiral... Uglavnom, stojim pred rampom na tom Trebežu z ormarom i gruntam kak se rešit te starudije.

Mogel sam ja ormara skipat pred rampom, al ne bi bilo v redu. Zval sam suseda kaj tu blizu stanuje i on meni počne pamet prodavat. Veli da ima tu dežurni, da na Trebežu uvek mora nekoga biti... Ja velim da sam obišel celi Trebež i da nema nigdi žive duše. Još sam mu rekel nek pročita Gogoljeve Mrtve duše, a onda je on rekel da smanjim pijaču i prekinul vezu.

Malo je i meni bilo čudno da tam nema nikoga, ali tak je bilo. Još sam jen cajt čital velke table na ulazu u Trebež di piše da se sve vidi na kamerama, da je tu video nadzor... Jedva sam se s prikolicom okrenul i doma krenul. Kad je žena vidla ormar nastal je dar-mar. Da kaj ja nju farbam, kaj lažem, kaj motam i di sam celi dan bil, s kim sam pil?

Meni su u zadnje vreme živci malo tanki kak račun vu banki, al sam još bil pri sebi. Zvadil sam mobitela i pokazal ženi spuštenu rampu, a ona je u daljini vidla tog aviona i pitala da na kakvoj sam to bil pisti!? Pisti? Ja sam čul nekaj drugo, ono prosto, na ionak zaštopana vuha zišla mi je para... Rekel sam joj sikaj, da joj pista materina i njoj i avionu i pilotu i rampi i reciklaži i takvome životu. Na kakvog ona to misli pilota, ak ga vlovim lišim ga kak piceka njegovog života!

Ona je rekla da nis normalan i nek si popijem tablete, da bu mi bole.

Zutra sam rano vjutro bil prvi na Trebežu. Hitil sam vražji ormar na hrpu tam kod tog aviona, tam di sam i čera zabadav bil.

Mam mi je nakak bilo lakše i bolje vole sam odmah bil.

Baš čudno, a niš si nis spil...

Romeo Ibrišević

• Registrirajte se za komentiranje
• Pregled komentara (0)