Glasnik-SSNInformativno glasilo Samobora i Svete Nedelje

Naš suradnik, fotograf i ekolog Romeo Ibrišević, u akciji u Vinogradskoj

Vidović proslavil kaj pak ima sto želja

Vidović je rekel nek dojdem pod hitno! Mam sam znal da je to nekaj bitno. I aparatlina nek ne zabim. Pa navek, kad idem v borbu, nosim punu foto torbu! I tak sam z voljom i na vreme došel do Vinogradske. To se službeno zove Klinički bolnički centar Sestre milosrdnice. To je tam u Zagrebu, pri Ilici, di su nedavno zrušili onaj rafunk velki, tam di se nigdar nebuš sparkiral i ak i dojdeš do tam zdrav, tak se znerviraš da moraš u bolnici i ostat, jer prosviraš. I kak da ja sad u toj gunguli Iveka Vidovića najdem? Vrtim mobitel i velim mu da sam se pogubil, več sam na tri odjela kriva vrata poljubil... Govorim mu nek dojde po mene, jer nemrem najti tu onkologiju, nebi je našel ni da sam zavšil stomatologiju!

On je rekel da ga čekam tam di je hitna, nek ne mičem dok ne dojde, jer, veli, stvar je jako jako bitna.

Dobežal je do mene, mahnul z rukom da ga pratim i moral sam bežat za njim kak stekli, se su me tabani pekli. Čez duge hodnike, gor-dol, pa po štengama uz lift, pak levo. Ivek je bil u beloj kuti, z belom kapom na glavi, bežal sam za njim i bil sam več sav kak dinamovac plavi. Mislil sam prvo da je Vidović postal doktor, jer v ruki mu je bila sekira. Morti nekog operira? Da ni Ivek malo krivo skrenul? Da ni, nedajbog, šenul?

Da ni pobegal psihijatru? I, da skratim, bežal sam za njim do prvoga kata, on je onda otprl ona strujna vrata i zrival me u velku sobu di je se dišalo po mladom luku, friško pečenom odojku i štrudli od jabuk. Ogledam se oko sebe i vidim okolo mesnu platu, gibanice, janjetine puni vandli... Vidim kolače od bele mele, hrpu kruha sake fele. Ni mi bilo jasno kaj se tu zbiva. K sebi sam došel tek kad je stigla druga mrzla piva.

A stvari je bila jednostavna. Saznal sam da je Ivek bil fejst betežan pak je, fala budi doktorim, prizdravil. Vidim da je dobro kad more tak fejst bežat. A one kaj su ga zlečili ni zaboravil. Došel im je skroz iz Šimraka u bolnicu iznenada, na prepad. Prigodno se je zrihtal i onda je doktore i sestre za slikanje i govor pošlihtal.

I fotografa je Ivek nabavil, mene je posebno pred doktorima pozdravil. Držal je Ivek dugi govor, svima se lepo zahvalil na brigi i skrbi i to kaj je ozdravil.

Doktor Petar Gačina prava je junačina, Silvija Mušica jako je dobra dušica, Nataša Išlić, pravedna je i stručna šefica interne klinike, nabraja Ivek i deli svima lovorike. Doktori i sestre su bili razneženi, atmosfera je bila baš zdrava, nekak, kak bi rekel, domača... Baš sam si pomislil da je grehota kaj se čovek ovde češče ne navrača. A onda me je radi grešnih misli ipak bilo sram. Jer, biti betežen, ležat, gledet v strop i mislit jel buš dočekal novi dan ni lahko.

Teško mi je bilo radi takvih misli odojka toplog gristi. Drmnul sam zato još jednu ljutu za dezinfekciju i, još jednu rakijicu za se doktore i sestre.

Za Iveka i njegovo zdravlje popil sam još jednu putnu lozu mednu. Jer znam da saki zdrav čovek ima bar sto želja, a betežan samo jednu.

Živi mi i zdravi bili.

• Registrirajte se za komentiranje
• Pregled komentara (0)