Glasnik-SSNInformativno glasilo Samobora i Svete Nedelje

Tu pomoči nema: Sabor zglasal, v Narodnim novinama zapisano

Friška prva pomoč vu starim autima

Sad sam več malo bolše, fala na pitanju. Al ni mi bilo lako kad je onaj čovjek v plavoj kuti (kaj samo dela i muči) rekel da moje vozilo "ni tehnički ispravno". Bremze su bile super, ručna drži, na testu di piše EKO pisalo je da tu tečeju med i mleko... Al ono kaj ne vredi je kaj se datum na prvoj pomoči baš ne vidi. Malkice je bledi... Veli tehničar da se ne vidi do kad ta plava škatula vredi.

Ja sam se zrušil u nesvest, v onu tehničku grabu, a onda sam zletel van kak ranjeni partizan na debelog Švabu. Nisu mi dali da mu skopam oči, pak mi je drhtavom rukom z plave kute zvadil te reči zakona di to piše, črno na belo, jasno i kruto: "Prva pomoč vredi pet let, zavisno od leta kad su ju napravili". To je novi zakon, vu Saboru su ga ovog leta uglavili. V prevodu: za nekog svog igrača su ga vladajuči valda napravili!

Istina ja, ne pratim redovito Narodne novine i nis čul da su to rekli na dnevniku. Ni na Novoj, ni na HTV-u. A morti sam baš tad bil i na WC-u...

Prešel sam brže-bole na benzinsku - INU i oni su rekli da imaju tih novih škatula. Pokazal mi je trgovac jednu frišku, finu. Mislil je on da bum naletil na minu. Za kompresnu gazu, par zavoja i škarice štel je 180 kuna. Pa takvu več imam v autu, al vredila je samo do ovog juna!

Onda sam prešel do Konzuma, v Pevec... I v Lidlu sam bil, pak sam se vrnul do benzinske i tam sam si konjaka spil. Da smirim živce maznul sam i črno Tomislav pivce. Propustil sam da je Sabor to službeno zglasal i prije, pak se sad na benzinskim mesto v birtijama pije. Sreča kaj sam ja tu povlasticu koristil neslužbeno i prije.

Al našel sam ja frišku kutijicu na kojoj piše NN1, vu čist petom dučanu – još po danu! A, kak sam još bil žedan, išel sam si natrag na pumpu poravnati živce. Tak sam bil znerviran, da bi si prije konačne tehničke inspekcije mogel popit i sa sredstva za dezinfekcije! Skupil sam ih doma tri kolekcije.

A onda, onaj klipan na tehničkom ni škatulu ni pogledal! Čim je lupil štambilja i na šajbu prilepil datuma, zleltel sam van z tehničkog i vrnul se do dučana. Rekel sam im da mi mesto te škatule daju za ženu mleko i ulje. Vrnul sam onda v auto onu svoju staru plavu škatulu, pregledal se zavoje i videl da nijedna ziherica ni hrđava i da sam novu ionak kupil zabadava.

Onda sam kupil i najnovije Narodne novine i videl da je starost prosječnoga voznoga parka prek 12,8 let. Ma, ta je škatula zakon zbilja za pet! Od njega mi se odmah piški - auti moreju biti stari, al ziherice i zavoj friški!

Na spovedi sam to pripovedal svojemu župniku, a onda se i on meni spovedal. Priznal je da je i on išel na pregled i da ih je se na ulazu mam lepo pozdravil kak se šika, z "Faljen budi Isusek i Marija!", a oni su i njemu rekli da mu je škatula prestarila.

Ziher si i vi mislite da je taj zakon obična zvizdarija, al to je sad na tehničkom najnovija fora: prva pomoč i škatula postala je nočna mora! Na to naročito paze, sakoga gdo nema nove ziherice i friške škare na tehničkom pregledu nagaze!

Predlažem da se od stare kompresne gaze sad na tehničkom, vu slobodno vreme, delaju maske za zaštitu od korone - em buju profitirali, em si stišali hormone, jer bu ih drugo leto na Trebežu na tone.

Mislim na te pomočne škatule, ne, valda, bombone.

Romeo Ibrišević

• Registrirajte se za komentiranje
• Pregled komentara (0)