Glasnik-SSNInformativno glasilo Samobora i Svete Nedelje

Na zabite: denes je Svjetski dan planina

Pod cerinskim slapom - fićo skup z ratkapom!

Slap Cerinski vir "otkrili" su samoborski planinari, vraćajući se iz Mesićeve kuće na Japetiću. Bil je to ožujak godine 1927. i bilo je već kasno popoldan. Grupu je vodil Stjepan Šoić, predsednik HPD-a Japetić. Vele kroničari da su skrenuli z glavnog puta pa prek potoka Javorec. Na Smerovišču su si šteli još nekaj spiti pri Dumiću. Put ni bil lahki, trajalo je to više od dve vure. Jako su se zmočili, a sušili su se pri Dumiću di su im seljaki rekli da niko normalan tuda još ni išel. Oni su pak bili tolko oduševleni glavobolčekom iz Mladine i Jaske da su im glave zutra bile kak daske, tak da nigdar više nisu tuda hodili.

A koji je vrag mene teral da idem baš tim putom nakon više od sto let, ne bi znal reči. Bil sam sam, niko me ni vodil i, da nemam sliku, ne bi bilo ni tona. Bog i bogme, priznal bi i na sudu da trezan baš nis bil, vodu z potoka nis pil, jer je ni bilo. No, blesav nis, a vi ak ne verujete, lepo se prešpancirajte još denes pa bute vidli isto kaj i ja. Tek da znate da sam tekel kakti slap, ravno sam hodil po suhu koritu. V dimižonki više nis imal vina, v grlu mi se posušila slina i zato sam bejžal pod breg kak da imam 15 let.

Dal bi ja tada pol ledine, kaj mi je darovala pokojna strina, da mi je bilo bar pol litre vina. Morti me je baš tad strefil tremens delirium, kad sam videl usred slapa plavog fičijus bez gum. Ma bile su tu i gume, samo malo doli niže, birtiji bliže. Da samo znate kak se niz slap teško zajde... Spuzal sam nekak, četveronoške po riti. Pri sv. Patriku su mi dali piti. Dobro se zmislim da sam im pripovedal kak su negda auti morali čvrsti biti. Kaj vi mislite, kulko je let taj fićo putoval od Cerine do slapa tak poprečki, kad sam ja jedva došal stoječki?!

Da, i nis vam rekel najvažniju stvar, još sam pri slapu našel stari televizor, akumulator, fičekov prozor i retrovizor. Televizor ni delal, al prozor je bil ko novi. Zglancan, čist i blista ko glavni glumac v onom filmu Moje pjesme moji snovi. Mam sam si zapopeval Hrvatsku sine voli i nek ti bude čvrst ko stina. Il, po domači, kak pečina.

I zato si dimižonku zemite i do Cerine krenite. Danas je Svjetski dan planina.

Romeo Ibrišević

• Registrirajte se za komentiranje
• Pregled komentara (0)